Кыргызстандын президенти Садыр Жапаров №26 Ленин бир мандаттуу округунда абактагы Равшан Жээнбековго добуш берди. Бул тууралуу «Евразиянеттин» («Eurasianet») редактору Питер Леонард социалдык тармактагы баракчасында билдирди.
Ал Жапаровдун бюллетенди урнага салып жаткан учурдагы сүрөтүн жарыялады. Ал жакта президент бир мандаттуу округда кимге добуш бергени көрүнүп калган.
«Прессага атайын ачыкталган болушу мүмкүн (балким андай эмес), президент Жапаров бир мандаттуу округда 2019-жылдын август айындагы башаламандыкка айыпталып, иши сотто каралып жаткан Равшан Жээнбековго добуш берди», — деп жазды Леонард.