Дүйнөлүк банк Кыргызстандагы аз камсыз болгон үй-бүлөлөргө жөлөкпулдун өлчөмүн көбөйтүүгө 25 миллион доллар берүү маселесин караштырып жатканын 11-майда Бишкекте кыргыз өкмөтүнүн жана аталган банктын биргелешкен форумунда белгилүү болду.
Жыйында айтылгандай, азыр жөлөкпул 810 сомду түзөт, чечим кабыл алынса быйыл 1-июндан тартып 1200 сомго чейин жогорулайт. Бул үчүн Дүйнөлүк банк убактылуу насыя берип, көмөгүн көрсөтүшү мүмкүн.
2020-жылы Кыргызстанда калктын 25,4% жакырчылыкта жашай турганы маалым болгон. Дүйнөлүк банк соңку эки жылдагы коронавирус пандемиясынан улам бул көрсөткүч дагы 10% жогорулашы мүмкүн экенин боолгоп жатат.
Бүгүнкү күндө өлкөдө 112 миң үй-бүлө жөлөк пул алат.