Кыргыз-тажик чек арасындагы соңку куралдуу кагылышта туткундалган кыргызстандык төрт аскер кызматкери бошотулуп, мекенине кайтарылды. Алар эки тараптуу сүйлөшүүнүн натыйжасында кайтарылганын Улуттук коопсуздук боюнча мамлекеттик комитеттин (УКМК) төрагасы Камчыбек Ташиев журналисттерге маалымдады.
«Барымтада турган төрт жоокерибизди алып чыктык. Төртөө тең аман-эсен. Бирөөнүн бутунда бир аз жаракат бар экен. Азыр баарын ооруканага толук текшерүүгө алып кетти, эртең туугандарына өткөрүп беребиз», — деди Ташиев.
Кыргыз-тажик чек арасындагы куралдуу кол салуудан 14-17-сентябрь күндөрү 40 аскер кызматкери курман болуп, 70тен ашууну түрдүү жаракат алган. Бир нече аскер кызматкери дайынсыз жоголгону кабарланган.