Кыргызстан жана Өзбекстандын өкмөттүк делегацияларынын жумушчу топторунун биргелешкен кыргыз-өзбек чек арасын демаркациялоо боюнча комиссиясынын кезектеги жыйыны болуп өттү. Бул тууралуу министрлер кабинетинин басма сөз кызматынан билдиришти.
Тараптардын жолугушуусу 2024-жылдын 4-мартынан 8-мартына чейин Ош шаарында өткөн.
Анын жүрүшүндө 2023-жылга карата аткарылган иштердин жыйынтыгы чыгарылып, 2024-жылга жолугушуунун графиги бекитилди, ошондой эле кыргыз-өзбек мамлекеттик чек арасын демаркациялоо жана демаркациялык карталарды жана атайын (жалпы) геодезиялык тармакты түзүү маселелери талкууланды.
Сүйлөшүүлөр достуктун жана өз ара түшүнүшүү маанайында өттү.
Иш-чаранын жыйынтыгы боюнча тиешелүү Протоколго кол коюлду.
Жумушчу топтордун кезектеги жыйыны Өзбекстандын аймагында өтөт.