Өкмөттүн Чүй облусундагы ыйгарым укуктуу өкүлүнүн аппарат жетекчиси Молдакун Абдылдаевдин сөөгү табылды. Бул туурасында Өзгөчө кырдаалдар министрлигинен билдиришти.
Буга чейин Молдакун Абдылдаев үй-бүлөсү: аялы, уулу, небереси жана айдоочусу болуп, 30-июнь күнү Суусамырга кеткен бойдон дайынсыз жоголгону тууралуу маалымат чыккан. Алар түшкөн унаанын сууга чөгүп кеткенин көргөндөр бар экени айтылган.
ӨКМ тараткан маалыматка караганда, бүгүн, 2-июлда саат 17:20да Жумгал районунун Арал айылынын тушунан Көкөмерен суусунан куткаруучулар 1 эркек кишинин (айдоочу) жансыз денесин таап чыгышты. Саат 20:00 чамасында Арал айылынан 12 чакырым алыстыктан Молдакун Абдылдаевдин өзүнүн сөөгү табылды.
«Кеч киргендигине байланыштуу саат 20:30да издөө иштери убактылуу токтотулду. КР ӨКМдин куткаруучулары Кожомкул айылындагы штабда тигилген чатырларда түнөп калышат. 3-июль күнү издөө иштери улантылат», -деп айтылат маалыматта.