Израил армиясы Орозо айт майрамынын экинчи күнүндө Газа тилкесине массалык чабуулдарын улантууда. Палестинанын WAFA маалымат агенттигинин кабарлашынча, эксклавдын ар кайсы аймактарындагы кол салуулардан кеминде 20 палестиналык набыт болгон.
Агенттиктин маалыматына караганда, түштүк сектордогу Хан Юнус шаарында израилдик аскерлер турак жай имаратына сокку уруп, төрт киши өлүп, бир нечеси жарадар болгон. Абасан аль-Кабира аймагындагы турак жайга жасалган кол салууда эки палестиналык каза болду.
Хан Юнустун борборунда израилдик учактар дагы бир турак жайды бомбалап, 6 адам каза болгон. Мындан тышкары шаардын батышында жер которгондор үчүн курулган чатыр лагерине кол салуу болуп, эки палестиналык набыт болуп, дагы бирөө жарадар болду.
Газа тилкесинин борбордук бөлүгүндөгү Эль Масдар айылына жасалган аба соккусунан 3 адам каза болду. Ас-Севарих аймагында, батыштагы Зевайде кыштагында, Израил аскерлери кайрадан чатыр лагерине чабуул жасап, бир кишини өлтүрүп, бир нече кишини жарадар кылышкан.
Сектордун түндүк бөлүгүндө, Жабалия аймагында Израилдин учактары палестиналыктардын бир тобуна чабуул жасап, эки киши каза болду. Ошондой эле Газанын борборундагы Бурейж качкындар лагеринде израилдик учкучсуз учак жер которгондор жашаган UNRWA мектебине бомба таштады. Натыйжада бир бала жабыркаган.
19-январда күчүнө кирген ок атышпоо келишимине карабай Израил 18-мартта Газага катуу кол салууларды кайра баштады.Бир күн мурда, майрамдын биринчи күнүндө Израил армиясы кеминде 33 палестиналыкты өлтүрдү.