Президент Садыр Жапаров бүгүн, 8-сентябрда, Нарын шаарына болгон жумушчу сапарынын алкагында аймакты социалдык-экономикалык өнүктүрүү пландары менен таанышты.
Президенттин Нарын облусундагы ыйгарым укуктуу өкүлү Нурбек Сатаров мамлекет башчысына жаңы төрөт үйүнүн, шаардык үй-бүлөлүк медицина борборунун курулушунун башталышы, ошондой эле Торугарт көмүр кенин иштетүүнү камтыган инвестициялык долбоорлордун ишке ашырылышы жана башкалар жөнүндө билдирди.
Ошондой эле Садыр Жапаровго Ат-Башы – Баетов – Казарман жолун куруу пландары тууралуу маалымат берилди.
Өз кезегинде мамлекет башчысы Жаман-Даван жана Терек-Сай суу сактагычтарынын жана каналдарынын курулушун, Баетов айылындагы борбордук парктын реконструкциясын аяктоону, Ак-Талаа районунда Коомдук маданий борборду курууга киришүүнү тапшырды.
Тааныштыруунун жыйынтыгында Президент Садыр Жапаров белгиленген долбоорлорду жүзөгө ашырууга бөлүнгөн каражаттарды максаттуу пайдаланууну камсыз кылуу тапшырмасын берди.