“Ала-Арча” мамлекеттик резиденциясында Кыргызстандын Шанхай кызматташтык уюмундагы (ШКУ) төрагалыгынын алкагында ШКУга мүчө мамлекеттердин жалпыга маалымдоо каражаттары жана аналитикалык борборлорунун форуму башталды.
Иш-чара Кыргыз улуттук “Кабар” маалымат агенттиги жана Кытайдын Синьхуа маалымат агенттиги менен биргеликте уюштурууда.
Форумга ШКУга мүчө мамлекеттерден, байкоочу өлкөлөрдөн 250гө жакын жергиликтүү жана чет элдик өкүлдөр катышууда. Бишкекке 26 өлкөдөн алдыңкы улуттук маалымат агенттиктеринин жетекчилери, башкы редакторлор, ири ЖМКлардын өкүлдөрү, аналитикалык борборлор, тиешелүү мамлекеттик органдар жана эл аралык уюмдардын өкүлдөрү келишкен.
Форумдун жүрүшүндө катышуучулар мамлекеттер ортосундагы ишенимди бекемдөөдө ЖМКлардын жана аналитикалык борборлордун ролун, маалыматтык кызматташтыкты өнүктүрүүнү, жалган маалыматтарга каршы күрөшүүнү, медианын санариптик трансформациясын, ошондой эле гуманитардык, экономикалык жана эксперттик өз ара аракеттенүү маселелерин талкуулашмакчы.
Жыйынтыгында ЖМКлар жана аналитикалык борборлор ортосундагы кызматташтыкты кеңейтүүгө багытталган биргелешкен демилгелерди кабыл алуу, ошондой эле бир катар меморандумдарга кол коюу пландалууда.