Ишкер Аскар Салымбеков Кыргызстанга келген товарлардын 75 пайызы Кытайдан келээрин белгилейт. Ал 1991-жылы ачкан базары кытай товарлары аркылуу өз ордун тапканын айтат.
«1980-жылдардын аягында эле кытайлар бизден, тагыраагы СССРден товар алышчу. Арадан аз убакыт өтпөй Кыргызстан эгемендүү өлкө болгон 1990-жылдары биз алардан товар алып калдык. 1995-жылдардан тартып алардын өндүрүшчүлөрү өнүктү. Учурда Кыргызстанга келген товарлардын 75 пайызы Кытайдан келет. Бул жагынан биз коңшу мамлекеттен үлгү алышыбыз керек», — деди Салымбеков.
Ишкердин айтымында Кыргызстан гигант өлкөнүн аракетинен өз ордун табуусу кажет. Эки өлкөнүн кызматташтыгы биздин чакан өлкө үчүн пайдалуу, бирок ошол эле учурда ыңгайсыздык да жок эмес. Ал — кыргыз өндүрүшчүлөрүнүн кытай өндүрүшчүлөрү менен тең тайлашууга мүмкүнчүлүгү жоктугу.
«Кыргыз ишкери кандай тармактагы кайсы ишкананы ачпасын чыгарган продукциясы кытай продукциясынан кымбат болуп калат», — деди ишкер.
Ал 30-40 жыл илгери эле Кытай жакыр өлкө болгонун, аз убакытта кескин өнүккөнүн жана Кыргызстан мындан үлгү алуусу керектигин кошумчалады.
Бүгүн Бишкекте Кытайдын 70 жылдыгына арналган тегерек стол өтүүдө.