Социалдык тармактарда жана WhatsApp мессенджериндеги “Ош облусунун Өзгөн районунда коронавируска чалдыккан жарандар аныкталды” деп тарап жаткан маалымат чындыкка дал келбейт. Бул тууралуу Саламаттыкты сактоо министрлигинин басма сөз кызматы бүгүн, 29-февралда билдирди.
“Бүгүнкү күндө өлкө аймагында коронавируска чалдыккан адамдар жок. Кыргызстанда эпидемиологиялык абал туруктуу” – деп айтылат маалыматта.
Күн мурун, 28-февралда Кара-Суу районундагы “Достук” өткөрмө-пунктунан Түштүк Кореядан Өзбекстан аркылуу келген Кыргызстандын бир жараны жана Россиянын эки жараны өткөн.
Санитардык-карантиндик пункттардын эрежелерине ылайык, алар убактылуу обсервациялоо жайларына жайгаштырылган. Бардыгынын абалы туруктуу жана коронавирустун белгилери табылган эмес.