Бүгүн, 18-мартта Кыргызстандын аймагында 3 адам коронавируска чалдыкканы аныкталды. Бул тууралуу өкмөттүн коронавируска карата чукул жыйынында айтылды.
Коронавирус Сузак районунун 3 жашоочусунан табылган. Алар жакында эле Сауд Арабиясына умрага барып келишкен. Учурда алар Ош облусунда обсервацияда жатышат.
Өкмөт элди дүрбөлөңгө алдырбоого жана жеке гигиенаны сактоого чакырды.
Эсиңиздерге салсак, кечээ 17-мартта Бириккен Араб Эмиратында 15 адам коронавирус менен ооруп жатканы айтылган. Бүгүнкү маалымат боюнча ооругандардын саны 113кө жеткен. Алардын бирөө кыргыз жараны.