«Кыргызнефтегаз» ААКтын башкармалыгынын төрагасы болуп Тургунбаев Мелис Жусупжанович дайындалды. Мындай чечимди 20-ноябрда директорлор кеңеши кабыл алган.
М.Тургунбаев 2017-жылдан бери «Кыргызнефтегаз» ААКтын директорлор кеңешинин төрагасы болчу. Ал эми 2013-2017-жылдары директорлор кеңешинин мүчөсү болгон.
Кыргызстанда 4-октябрдагы кезектеги парламенттик шайлоодон кийин бийлик алмашкан. Ошондон бери көптөгөн мекеме-ишканаларда да жетекчилер алмашууда. Президенттин милдетин убактылуу аткарган Садыр Жапаров мамлекеттик кызматтардагы дайындоолор өлкөдөгү саясий күчтөрдүн сунуштарын эске алуу менен жүргүзүлүп жатканын жана 2-3 айдан кийин ал орундардын баарына сынак аркылуу тандоо уюштуруларын 29-октябрда өкмөттүк жыйында билдирген.