Ош шаардык кеңешине шайлоонун жыйынтыгын жокко чыгарууну талап кылып беш партия аймактык шайлоо комиссиясына (АШК) арыз менен кайрылды. Бул тууралуу «Улуу-Журт» партиясынын өкүлү Мирлан Орозбаев билдирди.
Арызды алдын ала жыйынтык боюнча мандат албай калган «Келечек — Будущее», «Нур» «Улуу-Журт», «Бүтүн Кыргызстан» жана шайлоо алдында тизмеден чыгарылган «Ынтымак» партиясы жазган. Аталган партиялардын өкүлдөрү 11-июлда өткөн шайлоодо мыйзам бузуулар көп катталгандыгын, ар бир партияда далилдер бар экенин айтууда.
Ал эми Ош аймактык шайлоо комиссиясы аталган партиялардын талабы тууралуу азырынча комментарий бере элек.