14-октябрдын кечинде Тбилисинин борборундагы Эркиндик аянтында миңдеген адамдардын митинги өттү. Алар кайтып келгенден кийин кармалган Грузиянын экс-президенти Михаил Саакашвилини бошотууну талап кылууда.
Акцияны саясатчы негиздеген «Бириккен улуттук кыймыл» оппозициялык партиясы уюштурду.
Саакашвилинин адвокаты Ника Гварамия Саакашвилинин катын шаардык кеңештин имаратынын алдындагы сахнадан окуп берди. Саясатчы өз кайрылуусунда элди «Жамандык менен жалгандыктын Карфагени» менен күрөшүү үчүн биригүүгө чакырды.
«Биз баарыбыз биригишибиз керек — өлкө ичинде да, чет өлкөдө да, түрмөдө жана бардык шартта. Азыр партия же башка принцип боюнча бөлүнүү убактысы эмес. Грузияны сактап калууга мезгил келди. Ал үчүн биримдик эң маанилүү», — деп жазган Саакашвили.