Тажик аскерлери Ош облусунун Чоң-Алай районундагы айылдарды дагы аткылай баштады. Бул тууралуу Кыргызстан УКМКсынын Чек ара кызматы билдирди.
Маалыматка ылайык, Тажикстан ок атууну токтотуу жөнүндө макулдашууну бузуп, саат 12:37де миномёт жана артиллериялык курал менен Тешик-Таш, Карамык жана Кароол-Дөбө айылдарындагы кыргыз чек арачыларынын позициясын аткылай баштаган. Мындан улам кыргызстандык жоокерлер жооп иретинде ок чыгарган. Бирок абалды курчутпоо үчүн атышууну биринчи болуп токтоткон.
Мындан тышкары, саат 12:30-12:35 аралыгында Баткен районунун Төрт-Көчө аймагында жайгашкан ИИМдин Ички аскерлеринин бөлүктөрү аткыланган.
Азыркы тапта атышуу токтоп, окуя иликтенүүдө.
Кыргызстан менен Тажикстандын чек ара өкүлдөрүнүн сүйлөшүүсү башталды.