Түштүк Кореянын президенти Юн Сук Ёл өздөрүнүн Украинага курал же аскердик ок-дары берип жатат деген айыптоолорду четке какты.
Йонхап агенттигинин кабарына караганда Президент Юн Сук Ёл Россиянын президенти Владимир Путиндин Украинаны курал же аскердик ок-дары менен камсыздап жатат деген билдирүүсүнө жооп берди.
Юн борбор Сеулда басма сөзгө жасаган билдирүүсүндө Украинага курал же жабдык бербегендерин баса белгилеп : «Биз эл аралык коом менен тилектештиктин негизинде Украинага курал жана ушуга окшогон нерселерди эмес, бир гана гуманитардык жардам бердик»,- деди.
Президент Юн : «Бирок кандай болгон күндө да бул биздин эгемендүүлүк маселебиз жана биз бардык өлкөлөр, анын ичинде Россия менен тынчтык жана жакшы мамилени сактоого аракет кылып жатканыбызды билишиңизди каалайм», — деди.
Украина башкаруусу Түштүк Кореядан Россияга каршы колдонула турган аскердик техника сураган, бирок Сеул башкаруусу муну четке кагып, гуманитардык жардам көрсөтүүнү уланта турганын жарыялаган.