21-июнда Германия Федеративдүү Республикасынын президенти Франк-Вальтер Штайнмайер Кыргызстанга расмий сапар менен келгендигине байланыштуу Бишкек менен Чүйдө 23-июнга чейин жолдор маал-маалы менен жабылат. Бул тууралуу Жол кыймылынын коопсуздугун камсыздоо башкы башкармалыгынан билдиришти.
Чектөө киргизиле турган жолдор:
- «Манас» аэропортунан (Фучик көчөсү) Бишкек шаарына чейин;
- Жибек Жолу кең көчөсүнүн Фучик көчөсүнөн Жаш Гвардия бульварына чейинки бөлүгү;
- Жаш Гвардия бульварынын чыгыш тарабы Чүй кең көчөсүнө чейин;
- Чүй кең көчөсүнүн Жаш Гвардия бульварынан Манас проспектисине чейинки бөлүгү;
- Манас кең көчөсүнөн мамлекеттик резиденцияга чейин;
- Мамлекеттик резиденциядан «Ата-Бейит» мемориалдык комплексине чейин;
- Айланма жолдун Бишкектен Токмок шаарына чейинки аралыгы.
Жол кыймылынын коопсуздугун камсыздоо башкы башкармалыгы борбор калаанын тургундарын жана конокторун чектөөлөрдүн киргизилишине түшүнүү менен мамиле кылууга, каттамды алдын ала пландаштырууга, унааларды жолдун жээгинде калтырбоого, каршы тилкеге чыкпоого, жол тескөөчүлөрдүн талаптарын аткарууга, жолдо жүрүү эрежелерин так сактоого чакырат.