Нарын шаарында өтүп жаткан «Кыргыз шырдагы XIII» эл аралык фестивалынын алкагында мыкты шырдактар аныкталды.
Президенттин Нарын облусундагы өкүлчүлүгүнөн билдиришкендей, кароо-сынакка 230дан ашык шырдак коюлган.
«Мурас шырдагы» номинациясы боюнча баш байге Нарын районуна караштуу Миң-Булак айылынын тургуну Гүлсүн Калыковага ыйгарылды. Ал кайынэнеси 1933-жылы жасаган шырдакты 90 жылдан бери сактагандыгы үчүн 30 миң сом байгеге ээ болду.
Ал эми «Инновациялык шырдак» номинациясына Жумгал районунун Куйручук айылынын тургуну Нурай Эсенканованын чакмак шырдагы татыктуу деп табылып, 40 миң сом ыйгарылды.
«Мыкты шырдак» деп Кочкор районунан келген уз Сайкал Ниязованын шырдагы бааланып, 50 миң сом байге алды.
Мындан тышкары, «Мыкты ала кийиз» номинациясында Талас облусунан келген уз Кымбат Байматованын кол эмгеги жеңүүчү деп табылып 12 миң сом байге берилди. Тандалган эмгектер өлкөнүн музейлерине коюлмакчы.
Ошондой эле ондон ашык кол өнөрчүлөргө 1 миң сомдон 10 миң сомго чейинки акчалай сыйлыктар ыйгарылды.
Фестивалдын жалпы байге фонду 300 миң сомду түзүп, бул каражатты Маданият, маалымат, спорт жана жаштар саясаты министрлиги каржылады. Мындан сырткары, Соода-өнөр-жай палатасы 40 миң сом өлчөмүндө колдоо көрсөттү.