“Барселона” менен Азия легендаларынын футболдук беттеши төрт каналдан, ошондой эле ЭлТР телеканалынын социалдык тармактардагы расмий баракчаларында түз алып көрсөтүлөт.
Оюн Бишкектеги Дөлөн Өмүрзаков атындагы стадиондо өтөт. Беттеш саат 20:00дө башталат. Уюштуруучулардын маалыматына ылайык, түз эфир саат 19:40тан тарта жүргүзүлөт. Берүүлөр төмөнкү каналдарда көрсөтүлмөкчү:
• ЭлТР: Facebook, YouTube;
• Билим-Илим (ЭлТРдин алдындагы телеканал);
• УТРК Спорт;
• Кыргыз Спорт ТВ.
Оюн 30 мүнөттүк эки таймдан турмакчы.
Эске салсак, «Барселона» клубунун президенти Жоан Лапорта жана каталониялык команданын экс-оюнчулары 28-августта аталган клубдун Жалал-Абаддагы футбол академиясынын ачылышына, ошондой Бишкекте Барселона академиясынын имаратынын курулушуна капсула салуу аземине катышуу үчүн учуп келишкен. Кыргызстанда футбол академиялары жергиликтүү компания сатып алган франшиза менен ачылууда.
Аталган иш-чаранын алкагында «Барселона» менен Азия легендаларынын жолдоштук беттеши өтөт. Оюнга президент Садыр Жапаров катышып, Азия командасынын курамында ойномокчу.