Израилдин согуштук учактарынын кол салууларында 50гө жакын палестиналык каза болуп, ондогону жарадар болду.
Израиль армиясынын блокададагы Газа тилкесине кол салуулары уланууда.
Газа тилкесинин борбордук жана түндүгүндөгү кээ бир аймактар Израилдин согуштук учактары жана артиллериясы тарабынан катуу бомбалоолорго дуушар болду.
Палестинанын WAFA агенттигинин маалыматына караганда, Газа тилкесинин борбордук бөлүгүндөгү Нусайрат качкындар лагериндеги бир үйгө абадан кол салууда каза болгондор жана жарадар болгондор бар.
Индонезия ооруканасынын аймагы жана шаардын түндүгүндөгү Бейт Лахие аймагы согуштук учактардын бутасына алынды.
Абадан сокку уруулар менен бир убакта шаардын чабуулга кабылган аймактарына жарык берүүчү факелдер атылды.
Газанын кээ бир башка аймактарына, өзгөчө Римал районуна күчтүү артиллериялык аткылоо жүргүзүлдү.
Кол салуулардан улам жолдордо унаалардын кыймылына бөгөт коюлуп, жабыркагандарды куткаруу үчүн тез жардам унааларынын аймактарга жетүүсү мүмкүн болгон жок.
Мындан тышкары, Израилдин согуштук учактары Орто мунай станциясы деп аталган аймакка сокку урду, көптөгөн газалык үйлөрүн таштап кетүүгө аргасыз болду. Кол салуунун натыйжасында каза болгон жана жаралангандардын бар экени билдирилди.
Палестина кабар агенттигинин маалыматына караганда, Израилдин согуштук учактарынын Газа тилкесинин борборундагы Сабра районуна кол салууларынан 50гө жакын киши каза болуп, ондогон киши жараланды.
Израиль армиясынын билдирүүсүндө, Израиль согуштук учактарынын Газа тилкесиндеги Хамастын саясий бюросунун төрагасы Исмаил Ханийенин үйүн бомбалаганы белгиленди.
Кол салуу учурунун сүрөттөрү да бөлүшүлгөн билдирүүдө сөз болуп жаткан үйдүн кээде «Хамастын жогорку даражалуу өкүлдөрүнүн жолугушуу жери» катары колдонулганы айтылды.
Жергиликтүү булактар кол салуу учурунда Хамастын лидери Хания Газа тилкесинин сыртында болгонун кабарлашты.
Бир тараптан Израиль согуштук учактарынын Нусайрат качкындар лагериндеги Малайзия мектебин бутага алышынын натыйжасында 3 киши каза болуп, ондогон киши жараланды.
Мындан тышкары Израилдин согуштук учактары Газа тилкесинин түштүгүндөгү Хан Юнус шаарындагы палестиналыктардын байланыш мунараларын бутага алып, натыйжада бир бала каза болуп, көп сандаган киши жараланды.
Израиль армиясынын Газанын борбордук бөлүктөрүндө жер которгон палестиналыктардын баш калкалаган май куюучу станциясын бутага алышынын натыйжасында 9 палестиналык каза болуп, ондогон киши жараланды.
Шифа ооруканасынан атын атагысы келбеген булак, Израиль танктары оорукананын бакчасынан чегингенден кийин аскер бульдозерлери алынып келингенин айтты.
Оорукана бакчасындагы унаалардын чыгарылганын белгилеген булак, Израиль армиясынын бульдозерлеринин оорукананын короосунда «чоң масштабдуу казуу» жүргүзгөнүн билдирди.
Израиль басып алган Батыш Шериада 40 күндүн ичинде 2735 палестиналыкты камакка алды.
Ошол эле учурда, Иордания Израилдин кол салуулары астында калган Газа тилкесине жеткирүү үчүн Египетке медициналык жардам ташыган учак жөнөткөнүн жарыялады.
Израилдин согуштук учактары да Хизбуллахтын буталарына сокку урду.
Израиль армиясынын билдирүүсүндө, согуштук учактар тарабынан сокку урулган жерлердин арасында Хизбуллахка таандык бир топ аскерий пункттар бар экени белгиленди.
8-октябрдан бери Ливан-Израиль чек арасында Израиль армиясы менен Хизбуллахтын ортосунда маал-маалы менен бири-бирине кол салуулар болуп жатат.
Азырынча бул кол салууларда 74 Хизбуллахтын мүчөсү жана 6 израилдик аскер каза болду.
Газадагы өкмөт 7-октябрдан бери Израилдин кол салууларынан 11 миң 500 палестиналык каза болгонун билдирди.
Израиль армиясы палестиналыктар баш калкалаган түштүктөгү Хан Юнус аймагына баракчаларды ыргытып, аймактагы айрым пункттарды тез арада эвакуациялоону талап кылды.
Израиль армиясынын билдирүүсүндө Газанын түндүгүндөгү кагылышууда дагы бир аскердин каза болгондугу белгиленди.
Кагылышууда 2 израилдик аскердин оор жаракат алганы белгиленди.
Газа тилкесинде 31-октябрдан бери болгон кагылышууларда каза болгон израилдик аскерлердин саны 51ге жетти.