10-16-март күндөрү Бишкек шаарында үчүнчү дивизиондун («А» тайпасы) командалары арасында хоккей боюнча дүйнө чемпионаты өтөт.
Дене тарбия жана спорт департаментинен билдиришкендей, жеңиш үчүн алты өлкөнүн — Кыргызстан, Мексика, Түштүк Африка, Люксембург, Түркмөнстан жана Таиланддын командалары күрөшөт.
Бул беттештерде Кыргызстандын хоккей боюнча улуттук курама командасы экинчи дивизионго чыгуу үчүн күч сынашат. Командалар бири-бири менен бир айлампада ойношот.
Кыргызстандын хоккейчилер командасы беттеше турган күндөр:
- Кыргызстан — Таиланд, 10-март, саат 20:00;
- Кыргызстан — Люксембург, 11-март, саат 20:00;
- Кыргызстан — Түркмөнстан, 13-март, саат 20:00;
- Кыргызстан — Мексика, 14-март, саат 20:00;
- Кыргызстан — Түштүк Африка Республикасы, 16-март, саат 20:00.
Оюндар «Бишкек Арена» шаардык муз аянтчасында өткөрүлөт. Дареги: Виноградная көчөсү 1/3.