Окумуштуулар адамзат тарыхындагы эң байыркы алфавитти табышты.
Science Daily журналынын кабарына караганда илимпоздор Сириянын эң байыркы шаар борборлорунун бири болгон Умм-эль Маррадагы байыркы көрүстөндөрдө археологиялык казуу иштерин жүргүзүштү.
Пайдубалы эрте коло дооруна таандык бул көрүстөндөрдү казган изилдөөчүлөр алтын жана күмүш зер буюмдарын, 6 скелет, тамак бышыруучу идиштерди, карапа жана найзанын учтарын, ошондой эле беттерине жазуу чегилген бармактын узундугундагы 4 чопо цилиндр табышты.
Жонс Хопкинс университетинин археология профессору, казууну жүргүзгөн изилдөө тобунун мүчөсү Гленн Шварц датасы радиокөмүртек ыкмасы менен тастыкталган жазуулардын биздин заманга чейинки 2400-жылдарга таандык экенин аныкташкандарын жарыялады.
Шварц бул жазуулардын башка белгилүү алфавит системаларынан болжол менен 500 жыл мурункуга таандык экенин көрсөткөнүн белгилеп, бул ачылыштын алфавиттин биздин заманга чейинки 1900 — жылдан кийин Египетте же айланасында табылгандыгына байланыштуу ишенимди өзгөртөөрүн белгиледи.
Шварц табылган цилиндрлердин үстүндөгү жазуулардын мүрзөдөн чыгарылган буюмдардын кайдан келгени же кимге таандык экендиги тууралуу суроолорго жооп болушу мүмкүн экенин айтып : «Бирок жазууну которуучу аспап болбостон, биз божомол гана айта алабыз»,- деп кошумчалады.