Жогорку Кеңештин төрагасы Нурланбек Тургунбек уулу белгилүү ишкер, көрүнүктүү мамлекеттик жана коомдук ишмер Аскар Салымбековдун 70 жылдыгына карата уюштурулган маарекелик иш-чарага катышты.
Салтанатта төрага маареке ээсинин өлкө экономикасына кошкон салымы зор экенин белгиледи.
“Эгемендүүлүктүн алгачкы жылдарындагы өткөөл мезгилде карайлаган элге жол чырак болуп, ишкердикке умтулган жарандарыбыздын башында турдуңуз. Саздак жерди ири базарга айлантып, ийгиликтүү ишкерлердин бүтүндөй бир муунун жараттыңыз. Муну менен катар социалдык-экономикалык багыттагы долбоорлорду колдоого алып, спорт, маданий-агартуу жаатындагы жакшы демилгелериңизди ишке ашырып келесиз. Андыктан сиздин байсалдуу өмүр жолуңуз жалпы кыргызстандыктарга үлгү”,– деди ал.
Ошондой эле эмгеги менен эрдик жараткан инсандар өз учурунда бааланышы керектигин айткан төрага Нурланбек Тургунбек уулу Аскар Салымбековдун жасаган мээнетин баалап, “Эмгек Баатыры” артыкчылыктуу даражасын ыйгаруу демилгесин президентке сунуштагандыгын эске салды.
“Бизде көзү өткөндөн кийин гана аттиң деп, сыйлык-наам ыйгаруу салтка айланган. Бирок бул туура эмес. Тескерисинче, татыктуу инсанды көзү барында баалап, барктап алышыбыз керек. Бүгүн кыргыз ишкерлеринин көч башы аталган Аскар агабызга өлкө башчысы тарабынан ардактуу наамдын ыйгарылып жатышы жагымдуу саамалык”, – деди төрага.
Муну менен катар маареке ээсине жакшы тилектерин айткан Нурланбек Тургунбек уулу: “Сиз жасай турган иштер али алдыда. Кеменгер аксакалыбыз катары кеңешиңизди айтып, эл башында аман жүрүңүз”, – деп кошумчалады.
Эскерте кетсек, Токтогул Сатылганов атындагы Кыргыз улуттук филармониясында уюштурулган иш-чарага Жогорку Кеңештин депутаттары, мамлекеттик катчы, министрлер кабинетинин өкүлдөрү, коомдук-саясий ишмерлер, ишкерлер жана маареке ээсинин замандаштары менен шакирттери катышты.
Белгилей кетсек, күн мурун Аскар Салымбековго президенттин жарлыгы менен «Эмгек баатыры» артыкчылык даражасы ыйгарылган.