Израил армиясынын эртең менен Газа тилкесинин түрдүү аймактарына жасаган кол салууларынын натыйжасында көбү аялдар жана балдар болгон 28 палестиналык набыт болду. Дагы ондогон адамдар жарадар болгонун ооруканалардагы булактар жана күбөлөр кабарлашты.
Алардын айтымында, соккулар ошол кезде жарандар жардам күтүп турган турак жайларды, чатыр лагерлерди жана балдардын тамак-ашын бөлүштүрүүчү пунктту бутага алышкан.
Газанын борборундагы Дейр эл-Балах шаарында Израилдин учкучсуз учагы медициналык борбордо кошумча тамак-аш алуу үчүн кезекте турган палестиналыктарга кол салды. Натыйжада 13 киши, анын ичинде аялдар жана балдар набыт болгон.
Бурейж качкындар лагеринде ракета турак жайга тийип, бир үй-бүлөнүн төрт мүчөсү набыт болду.
Нусейрат лагеринде эки кол салуу катталган: бири турак жайга жана экинчиси эл көп чогулган жерге. Эки адам өлүп, ону жарадар болгон.
Газа тилкесинин түштүгүндөгү Маваси аймагында жер которгон адамдар жашаган чатырларга абадан сокку урулду. Беш адам, анын ичинде эки бала каза болгон. Кеминде 20 киши жараат алды.
Хан Юнустун батыш тарабындагы Муаскар аймагындагы турак жайга абадан сокку урулуп, бир аял жана анын үч баласы набыт болду. Кеминде 20 киши жараат алды.
Израил армиясы Хан Юнус менен Газа шаарынын чыгышында да “көчүрүү буйругун” жарыялап, андан кийин ондогон үйлөрдү бузууга киришти. Ошол эле учурда түнү бою аткылоо жана бомбалоо улантылды.