Азербайжан менен Армениянын лидерлеринин Абу-Дабидеги жолугушуусунда эки өлкөнүн ортосундагы бардык келишпестиктер талкууланды, деп билдирет Азербайжан маалымат агенттиги.
Сүйлөшүүлөр төрт сааттан ашык созулду. Алар ар кандай форматта – жекеме-жеке жана тышкы иштер министрлери менен кеңешчилердин катышуусунда өттү.
Сүйлөшүүлөргө Баку менен Москванын ортосундагы келишпестик, ошондой эле Түркия менен Америка Кошмо Штаттарынын эки өлкөнүн тез арада жарашуусуна колдоо көрсөтүүсү жаңы дем берди. Орусия көптөн бери эки өлкөнүн ортосунда ортомчу болуп келгени менен бул процесстен четте калды.
«Атайын билдирүүлөр болбосо дагы, алардын жолугуп, негизги маселелерди талкуулаганынын өзү маанилүү кадам», — деп жазды Карабак чатагы боюнча эксперт Олеся Вартанян Твиттерде.