Киев орус тарапка орус президенти Владимир Путин менен Украинанын президенти Владимир Зеленскийдин жолугушуусун августтун аягына чейин өткөрүүнү сунуштады. Бул тууралуу Стамбулда Орусия Федерациясы менен тынчтык сүйлөшүүлөрүндө Украина делегациясынын башчысы Рустем Умеров жолугушуунун жыйынтыгы боюнча маалымат жыйынында билдирди.
Умеров Украина ырааттуу түрдө лидерлердин жолугушуусун жактап келгенин баса белгиледи. «Биз буга кечээ эле даяр болчубуз. Бүгүн даярбыз. Эртең да даяр болобуз. Мындай жолугушуу чыныгы саясий прогресстин кулпусун ачышы мүмкүн. Орусия өзүнүн даярдыгын көрсөтүшү керек», — деди ал.
Умеров Түркиянын ортомчулук аракети жана сүйлөшүүлөрдү уюштуруусу үчүн ыраазычылык билдирип, Түркияны «диалог жана тынчтык үчүн маанилүү платформа» деп атады.
Делегациянын башчысы Украина туткундарды алмаштыруу маселеси боюнча мындан аркы жылыштарды күтөрүн белгиледи.
Анын айтымында, жолугушууда орусиялык тарап үч жылдан ашык туткунда жүргөн адамдарды кайтарып берүүгө макул болгон.
Умеров Орусия Федерациясы менен Украина мындан ары аскерий жана жарандык туткундарды алмашуу боюнча макулдашканын жана туткундарды алмашуу боюнча сүйлөшүүлөрдүн жаңы айлампасын өткөрбөй турганын кошумчалады.
«Биз адилеттүү жана туруктуу тынчтыкка жетишүү үчүн сүйлөшүү процессин улантабыз – биздин бардык элибизди, анын ичинде Орусияга мыйзамсыз депортацияланган балдарды кайтарып берүү», — деди ал.
Украина эч кандай шартсыз ок атышууну токтотууга макул. Бул тууралуу Украинанын Тышкы иштер министрлигинин өкүлү Георгий Тыхий жолугушуунун жыйынтыгын комментарийлеп жатып билдирди.
Дипломат орус тарап 3 жылдан ашык туткунда жаткан адамдарды бошотуу сунушун кабыл алганын кошумчалады.