АКШнын президенти Дональд Трамп Орусиянын мурдагы президенти Дмитрий Медведевдин билдирүүлөрүнө жооп кылып, «эки атомдук суу астындагы кемени тиешелүү аймактарга жайгаштырууга буйрук бергенин» айтты.
Трамп, Truth Social каналындагы билдирүүсүндө Орусиянын мурдагы президенти Медведевдин өзөктүк куралдын колдонулушуна байланыштуу сөздөрүнө жооп берди.
Дональд Трамп өз билдирүүсүндө: «Орусиянын мурдагы президенти, Орусия Федерациясынын Коопсуздук кеңешинин төрагасынын орун басары Дмитрий Медведевдин өтө провокациялык билдирүүлөрүнө жооп кылып, эки суу астындагы кеменин тиешелүү аймактарга жайгаштырылышына буйрук бердим», — деди.
АКШ президенти өзөктүк маселелер боюнча билдирүүлөрүнүн кесепеттерин эскертти: «Сөз маанилүү жана көп учурда жагымсыз кесепеттерге алып келиши мүмкүн. Бул учурда андай болбойт деп үмүттөнөм».
Дүйшөмбү күнү Медведев Трамптын билдирүүлөрүнө кескин жооп кайтарып, Вашингтондун саясаты “Орусия менен АКШнын ортосунда кеңири жаңжалды тутантуу коркунучу бар” деп билдирди.