Лев Толстой атындагы Тынчтык сыйлыгына ээ болгон Борбор Азиянын үч өлкөсүнүн лидерлери — Кыргызстандын президенти Садыр Жапаров, Тажикстандын президенти Эмомали Рахмон жана Өзбекстандын президенти Шавкат Мирзиёев — башкаларга үлгү болууга татыктуу. Мындай ишенимин сыйлыкты тапшыруу аземинде куттуктоо сөзү менен чыгып сүйлөп жатып Россиянын президенти Владимир Путин билдиргенин ТАСС жазды.
Мамлекет башчылары бул сыйлыкты 1990-жылдардан бери аталган өлкөлөрдүн ортосундагы мамилени курчутуп келген чек ара маселелерин жөнгө салгандыгы үчүн алышты.
«Бизде сыйлык ээлерин куттуктоого жакшы себеп бар. Сиздерден үлгү алабыз», — деди Путин.
Россиянын лидери лауреаттарга «тынчтыкка жана өз ара түшүнүшүүгө кызмат кылуу сыяктуу асыл миссияларында мындан аркы ийгиликтерди», ал эми Кыргызстан, Тажикстан жана Өзбекстандын элдерине «туруктуулук жана гүлдөп өнүгүү» каалады.