АКШнын президенти Дональд Трамп Орусиянын президенти Владимир Путинден «бир жума бою Украинага кол салбоону» суранганын жана орус лидери макул болгонун билдирди.
Трамп орусиялык кесиптешине бул өтүнүчтү «өтө суук аба ырайынан улам» айтканын түшүндүрдү.
АКШнын президенти ошондой эле Абу-Дабиде уланып жаткан тынчтык сүйлөшүүлөрүндө «чоң ийгиликтерге» жетишилерине ишенерин жана чыр-чатактын аякташына үмүттөнөрүн билдирди.
Жолугушууга катышкан Трамптын атайын өкүлү Стив Виткофф сүйлөшүүлөрдө олуттуу ийгиликтерге жетишилгенин айтып, бул ийгиликке жетишкени үчүн Трампка ыраазычылык билдирди.
Орус тарап бир жуманын ичинде соккуларды токтотуу боюнча келишимди тастыктаган жок, бирок Украинанын президенти Владимир Зеленский АКШнын энергетикалык инфраструктурага кол салууну токтотуу боюнча аракеттери үчүн ыраазычылык билдирди.
«Биз Кошмо Штаттар муну ишке ашыра алат деп үмүттөнөбүз. Бүгүн АКШ президентинин билдирүүсү болду. Бүгүн кечинде жана алдыдагы күндөрү боло турган кырдаал — биздин энергетикалык объектилерибиздеги жана шаарларыбыздагы реалдуу абал — иштердин чындыгында кандай экенин көрсөтөт», — деп жазган Украинанын лидери бир күн мурун Telegram баракчасына.