Ош облусунун тургундарына Түндүк – Түштүк альтернативдүү унаа жолу аркылуу Ысык-Көлгө барууда түнкүсүн убактылуу чектөөлөр киргизилгени эскертилди.
Президенттин Ош облусундагы өкүлчүлүгүнүн басма сөз кызматы билдиргендей, 2026-жылдын жай-күз мезгилинде транспорттун агымы кескин көбөйгөндүгүнө байланыштуу Нарын облусунун Жумгал районундагы Сары-Булуң тилкеси күн сайын саат 20:00дөн 06:00гө чейин унаа кыймылы үчүн жабылып турат.
Бул чектөө жарандардын коопсуздугун камсыз кылуу максатында киргизилүүдө.
Бийлик өкүлдөрү Ысык-Көлгө сапарга чыгууну пландап жаткан Ош облусунун тургундарын каттамды алдын ала мерчемдеп, жолдун жабылуу графигин эске алууга чакырат.