Түркия АКШны курал-жарак сатып алуу маселесине кийлигишпөөгө чакырды
Түркия тышкы иштер министри Мевлүт Чавушоглу НАТО боюнча өнөктөш өлкөлөрдү Анкаранын курал-жарак сатып алуу ишине кийлигишпөөгө чакырды. Күн мурун АКШнын Мамлекеттик департаменти Түркияны Орусиядан С-400 ракеталык системаларын сатып алганы үчүн сындаган.
Түрк дипломатынын айтымында, жылдар бою кандай гана курал болбосун сатып алууга тоскоолдуктар жаралып келген.
АКШнын Мамлекеттик департаменти эгер Анкара С-400 ракеталарын сатып алуудан баш тартпаса, Вашингтон F-35 аскердик учактарын жеткирүү программасын кайра карай турганын эскерткен.
Түркия Орусиядан С-400 ракеталык комплекстерин сатып алуу боюнча келишимге 2017-жылы кол койгон. Ошол эле маалда былтыр Анкара АКШдан үч жарым миллиард долларга “Патриот” ракеталык комплекстерин сатып алган.
АКШ менен НАТОнун өкүлдөрү Түркия Орусиянын аскер системаларына ээ болсо, Түндүк Атлантикалык Альянстын жашыруун технологиялары Москванын колуна тийип калышы ыктымал деп чочулашат.