Кыргызстан мусулмандары диний башкармалыгынан маалымдагандай, Кыргызстанда жума намаздарын мечиттен окууга уруксат берилди. Бирок Муфтият жума намаздарын мечитте окууга келгендер сактык чараларын бекем сактоого тийиш экендигин билдирет. Ал эрежелер төмөндөгүлөр:
— күнүмдүк беш убак жана жума намазына келүүчү жарандардын беткап тагынуусу талап кылынат;
— мечиттин айланасына дезинфекциялоочу каражаттарды жана жарандардын дене табын текшерүү иш-чараларын жүргүзүү керек;
— мечитте адамдардын ортосунда 1,5 метрдик аралыкты так сактоо зарыл;
— жарандардын кол алышып, кучакташып көрүшүүсүнө тыюу салынат;
— даарат жана сүннөт намаздарды үйдөн окулушу керек;
— жаш балдар, жашы өтүп калган кары-картаңдар жана ооругандар, дене табы көтөрүлүп жаткан жарандардын мечитке келбей туруусу талап кылынат;
— мечитке келген жарандар көп убакытка кармалбай, 15-20 минөттүн аралыгында чыгып кетүү сунушталат;
— жамаат намаздары ачык абада мечиттин короосунда өткөрүү сунушталат;
— ар бир адам мечитке келгенде жайнамазын ала келүү керек.
Кыргызстанда 2600дөн ашык мечит бар.