Дүйнө жүзү боюнча коронавирустун жаңы түрүнөн (Ковид-19) көз жумган адамдардын саны 902 миң 768ден ашты. Жуктуруп алгандардын саны 27 миллион 784 миңден, ал эми илдеттен айыгып кеткендердин саны 19 миллион 879 миңден ашты.
Дүйнөдө Ковид-19 оорусу жана вирустун кесепетинен өлүм эң көп катталган Америка Кошмо Штаттарында (АКШ), ушул кезге чейин вирустун кесепетинен 194 миң 37 адам каза болуп, 6 миллион 514 миң 376 жуктурган учур аныкталды. «Төбө» вебсайтындагы кабарга караганда, Америка Педиатрлар Академиясы жана Балдар ооруканасы фонду тарабынан даярдалган докладда, Ковид-19 20-августтан 3-сентябрга чейин болжол менен 70 миң балада аныкталды, бул балдар арасында мурунку эки жумага салыштырмалуу 16 пайызга көбөйгөн деп айтылган. Билдирүүгө ылайык, эпидемия башталгандан 3-сентябрга чейинки мезгилде 513 миң 415 баладан Ковид-19 табылды.
41 миң 586 жоготуу менен, Европада эң көп өлүм катталган Англияда оорулардын саны 352 миң 560 болду. Премьер-министрликтин билдирүүсүндө, дүйшөмбү күндөн баштап, жаңы мыйзамдык чектөө менен, 6дан ашык кишинин айрым учурларды эске албаганда, жабык же ачык жерлерде жолугушуусуна тыюу салынары кабарланды. Билдирүүдө ошондой эле Ковид-19 чаралары менен сыйынуучу жайлар, мектептер, сөөк коюу, үйлөнүү тойлору жана айрым спорттук мелдештер ушул тыюу салуулардан бошотулат деген маалымат бөлүшүлдү. Тыюуларды бузган жыйындарды полиция таркатышы мүмкүн же эрежеге баш ийбегендерге биринчи кезекте 100 фунт (болжол менен 970 лира), ал эми кайталап мыйзам бузса 3 миң 200 фунтка чейин айып пул салынышы мүмкүн экендиги эскертилди.
Бразилияда акыркы 24 саатта 504 адамдын өлүмү менен, өлкөдө вируска байланыштуу каза болгондордун саны 127 миң 464кө, ал эми жуктуруп алгандардын саны 14 миң 269га көбөйүп, 4 млн 162 миң 73кө жетти.
Мексикада акыркы бир күндө Ковид-19дан каза болгондордун саны 703кө көбөйүп, 68 миң 484кө, жуктуруп алгандардын саны 5 миң 351ге көбөйүп, 642 миң 860ка жетти.
Италияда акыркы 24 саатта коронавирустун жаңы түрүнөн улам 10 адам каза болуп, жалпы каза болгондордун саны 35 миң 563кө чейин жогорулады. 1 миң 370 жаңы жуктурган учур менен, Ковид-19 жуккан адамдардын саны 280 миң 153 болгон. Премьер-министр Жузеппе Конте кол койгон буйрук менен, алдын-алуу чаралары дагы деле колдонулуп, айрым өлкөлөргө барууга тыюу салуу 7-октябрга чейин узартылды.
Францияда акыркы 24 сааттын ичинде 38 адамдын өлүмү менен, вирустан каза тапкан адамдардын жалпы саны 30 миң 764кө чейин көбөйдү, ал эми 6 миң 544 адамда дагы вирус аныкталып, жуктуруп алгандардын саны 335 миң 524кө жетти. Өлкөдө тесттердин позитив көрсөткүчү 5,2 пайызга чейин көтөрүлдү.
Испанияда акыркы жумада Ковид-19дан 261 адам көз жумса, каза болгон адамдардын саны 29 миң 594кө жетти. Саламаттык сактоо министрлиги акыркы бир сутканын ичинде 8 миң 964 жаңы учур катталганын, ооруну жуктуруп алгандардын саны 534 миң 513кө жеткенин жарыялады. Ошол эле учурда, Испания боюнча акырындык менен башталган жаңы окуу жылынын алкагында борбор шаар Мадриддеги бала бакчалар жана башталгыч мектептер кечээ сабактарын баштады. Шаардагы француз орто мектебинде бир класс Ковид-19 окуясынан улам карантинге алынып, ал жактагы окуучулар үйлөрүнө жөнөтүлгөнү маалым болду.
Португалиянын Саламаттык сактоо министрлиги акыркы сутканын ичинде 3 адам каза болгонун жана Ковид-19дун айынан 388 жаңы учур катталганын жарыялады. Өлкөдө адамдардын өлүмү 1 миң 846га, ал эми илдетке чалдыккандардын саны 60 миң 895ке чейин көбөйгөн.