Токио Олимпиада оюндарында медаль алган Айсулуу Тыныбекова менен грек-рим күрөшүнүн балбаны Акжол Махмудовго II даражадагы «Манас» ордени жана 10 миллион сомдук акчалай сыйлык ыйгарылды. Мындан сырткары, Toyota RAF 4 унаа белекке берилди.
Өз кезегинде Айсулуу Тыныбекова президенттин колдоосуна ыраазычылык билдирип, 2024-жылы Парижде өтүүчү Олимпиада оюндарына катышарын билдирди.
Ушундай эле сыйлык менен грек-рим күрөшүнөн Олимпиаданын күмүш медалын уткан Акжол Махмудовго да берилди.
Ал эми Олимпиадада күрөш боюнча коло медаль уткан Мээрим Жуманазарова болсо III даражадагы «Манас» ордени менен сыйланып, 7 миллион сом акчалай сыйлык жана президенттин колунан Toyota RAF 4 автоунаанын ачкычын алды.
Белгилей кетсек, Токиодо өткөн Олимпиада оюндарында Акжол Махмудов (күмүш), Айсулуу Тыныбекова (күмүш) жана Мээрим Жуманазарова (коло) байгелүү орундарды ээлешкен.