Кыргызстандык мушкер Валентина Шевченко 7-апрель күнү Кыргызстанга келет. Бул тууралуу Шевченко өзү видео кайрылуу жасады.
Анда мекендешибиз, “Урматтуу, достор! Мен сиздер менен кубанычтуу кабарды бөлүшкөнү турам. Мен, Бишкекке барам. Жакында көрүшөбүз!”,-деп айтты. Ал акыркы жолу Кыргызстанга 8 жыл мурун, тактап айтканда 2011-жылы келген болчу.
Ал арада спортчу Кыргызстандын Түштүгүн да кыдыра турганы боюнча маалымат тарады. Ал 9-апрелде Ошко барып, күйөрмандары менен жолугат. Бул туурасында Ош шаардык дене-тарбия жана спорт комитиетинин маалымат катчысы Жылдыз Аятиллаева билдирди.
Анын айтымында, спортчу айымдын Оштогу күйөрмандары менен жолугушуусу борбордук аянтта кечки саат 18:00дө болот.
Валентина Шевченко азыр UFC уюмунун эң жеңил салмагында чемпион жана дүйнөлүк рейтингде алдынкы катарда турат. Ал, чемпиондук курун өткөн жылдын 8-декабрында польшалык Жоанна Енджейчикти утуп, колго киргизген.
Эми, Шевченко кезектеги беттешин ушул жылдын 9-июнда өткөрөт. Ал күнү анын атаандашы америкалык Жессика Ай болмокчу.