«Биз Кыргызстанда жашайбыз, мамлекеттик тил — кыргыз тили. Биз өзүбүз Жогорку Кеңеште тилибизди сыйлашыбыз керек», — деди депутат Надира Нарматова 12-январда парламенттин жыйынында.
«Арабызда 90 депутаттын арасында бир дагы орус жараны жок. Биз өзүбүздү сыйлайлы андан кийин башкалардан талап кылалы», — деди ал.
Нарматованын айтымында, депутат Султанбай Айжигитов эки тилде тең эркин сүйлөйт. «Анын үстүнө түз эфирди карапайым кыргызстандыктар карап турат, эгер зарылчылык болбосо, маселелерди мамлекеттик тилде талкуулаш керек», — деп кошумчалады ал.
Буга чейин депутат Адахан Мадумаров тилдерди аралаштырбоону — же жалаң «таза кыргызча», же «таза орусча» сүйлөөнү сунуштаган.
Ал эми депутат Султанбай Айжигитов кыргыз тилин Мадумаровдукундай деңгээлде билбестигин айтып, орусчага жооп берүүгө өттү.