Кыргызстанда лицензиялык талаптарга жооп бербеген 111 менчик медициналык клиника жабылат. Бул тууралуу Саламаттык сактоо министрлигинин басма сөз кызматы билдирет.
6-апрелдеги буйруктун негизинде жеке медициналык уюмдардын лицензиялык талаптарга жооп берер-бербесин текшерүүчү комиссия түзүлгөн. Маалыматка ылайык, республика боюнча жалпы 370 клиника текшерилген.
«Лицензиянын жоктугу, уруксатсыз жүргүзүлгөн медициналык ишмердүүлүк, даректин дал келбеши сыяктуу фактылардын негизинде кабинет/клиниканы жабуу боюнча 111 акт түзүлдү», — деп айтылат билдирүүдө.
Ал эми инфекциялык текшерүүнүн стандарттарына туура келбеген 148 жеке клиникага мыйзамга ылайык айып салынат.