Бүгүн борбор калаадагы «Ататүрк» паркында советтик жоокерлердин Ооганстандан чыгарылгандыгынын 34 жылдыгына карата эскерүү-митинги өттү.
Иш-чарага коргонуу министри Бактыбек Бекболотов, афганчы-ардагерлер, Бишкектин биринчи вице-мэри Мирлан Байгончоков, «Кант» аба базасынын өкүлдөрү жана башка жарандар катышты.
1989-жылы 15-февралда Ооганстандан советтик жоокерлер чыгарылган. Көптөрдүн өмүрүн алган бул кагылыш расмий түрдө 1979-жыл 25-декабрь деп белгиленип келет. Себеби ошол датада советтик аскерлер Ооганстандын аймагына киргизилген. Он жылга чукул созулган согушта интернационалист-жоокерлердин арасында жети миң кыргызстандык да болгон. Алардын 300гө жакыны өлүмгө тике карап, баатырларча курман болгон. 1500 аскер жаракат алса, төрт жоокердин дайыны чыкпай калган.