Украинанын президенти Владимир Зеленский Владимир Путиндин согуштун уланышын каалап жатканын айтып: «Путин бул согуштан чыга албайт, анткени чыкса анда анын эч нерсеси калбайт», — деди.
Зеленский социалдык медиада жазган жазуу түрүндөгү билдирүүсүндө АКШнын Орусия-Украина согушун токтотуу үчүн 30 күндүк ок атышпоо сунушун кубаттады.
Украинанын Сауд Аравиянын Жидда шаарында өткөн жыйында АКШ сунуштаган «30 күндүк чукул ок атышпоону» кабыл алганын эске салган Зеленский мунун согушту токтотуу үчүн маанилүү кадам болушу мүмкүн экенин баса белгиледи.
Путиндин сунушка байланыштуу кечээки билдирүүлөрүнө токтолгон Зеленский Путиндин бир катар шарттарды койгонун айтты.
«Ал ок атышууну токтотууну каалабайт. Ага согуш керек. Ар дайым белгилүү болуп келген, азыр да түшүнүктүү», — деп жазган ал.
Анын пикиринде, АКШ Орусияга кысым көрсөтүшү керек: «Путин өзү согушту токтотпойт, бирок Американын күчү аны мажбурлоого жетиштүү».
Президент Путиндин Минск сүйлөшүүлөрүндө сүйлөшүү процессин мурда атайылап создуктурууга аракет кылганын айтты.
Ок атышпоону камсыз кылуу үчүн америкалык тарап менен эффективдүү жана тез иштөөгө даяр экенин баса белгилеген Зеленский: «Биз согуш оюндарын ойногубуз келбейт. Согуштун ар бир күнү элибиздин өмүрүн жоготуу болуп саналат жана бул биздеги эң баалуу нерсе» — деди.