Өзбекстандын Самарканд шаарында өтө турган «Борбор Азия — Европа биримдиги» саммитинин алкагында эртең, 4-апрелде Борбордук Азия мамлекеттеринин башчыларынын жана Евробиримдиктин башкы институттарынын жетекчилеринин көп тараптуу иш-чаралары өтөт. Бул тууралуу Өзбекстан президентинин сайтына жарыяланды.
«Келечекке инвестиция салуу» урааны менен өткөрүлүп жаткан саммитти Өзбекстандын президенти Шавкат Мирзиеев төрагалык кылып, инвестициялык кызматташтыкты кеңейтүү, товар жүгүртүү, жашыл энергетика, кен казып алуу, айыл чарба, транспорт, логистика жана санариптештирүү багытында биргелешкен долбоорлорду өнүктүрүү маселелери талкууланат.
Саммитке Европа кеңешинин президенти Антонио Кошта, Европа комиссиясынын президенти Урсула фон дер Лейен, Казакстандын президенти Касым-Жомарт Токаев, Кыргызстандын президенти Садыр Жапаров, Тажикстандын президенти Эмомали Рахмон жана Түркмөнстандын президенти Сердар Бердымухамедов катышмакчы.