Азия өнүктүрүү банкы (АӨБ) менен Өзбекстан 2025–2026-жылдар аралыгында 3,6 млрд АКШ доллары өлчөмүндөгү насыя бөлүү жана 23 инвестициялык долбоорду ишке ашыруу боюнча келишимге кол коюшту. Бул тууралуу 6-7-майда Италиянын Милан шаарында өткөн АӨБдин Башкаруучулар кеңешинин 58-жылдык жыйынында маалым болду.
АӨБдин Башкаруучулар кеңешинин 2025-2026-жылдарга карата төрагалыгы Өзбекстанга өткөрүп берилип, өзбек делегациясынын жетекчиси, премьер-министрдин орун басары Джамшид Ходжаев Кеңештин төрагасынын милдетин аткаруучу болуп бекитилди.
Жаңы инвестициялык долбоорлор өлкөнүн социалдык-экономикалык өнүгүүсүн колдоого багытталып, негизинен үч артыкчылыктуу багытты камтыйт: билим берүү жана суу менен камсыздоо системаларын модернизациялоо, транспорттук инфраструктураны өнүктүрүү жана каржылык-техникалык колдоо көрсөтүү.
2026-жылдын май айында Самарканда өтө турган АӨБдин Башкаруучулар кеңешинин кийинки жылдык жыйыны да Өзбекстанда экинчи ирет кабыл алына турган болду.
Серепчилердин баамында, бул келишим Өзбекстандын инфраструктурасын модернизациялоого жана АӨБ алдындагы ишенимдүүлүгүн чыңдоого шарт түзөт.
Эскерте кетсек, акыркы беш жыл ичинде АӨБ Өзбекстанга жалпы 5,41 млрд доллардан ашык каражат бөлгөн. Бул каражаттар «жашыл» экономикага өтүү, жеке секторду колдоо жана адам капиталына инвестициялоо максатында пайдаланылды.