Бүгүн, 19-сентябрда балбан кыз Айсулуу Тыныбекова Казакстандын борборундагы Дүйнөлүк чемпионатта беттешет. Ал 62 кг салмакта 2020-жылы Токиодо өтө турган Олимп оюндарына жолдомо үчүн мексикалык Алехандра Ромеро Бонилла менен күрөшөт.
Белгилүү болгондой Айсулуу буга чейин Алехандра менен беттешкен эмес. Бирок ал 2018-жылдагы Дүйнөлүк чемпионатта 5-орунду камсыз кылган. Эгерде Айсулуу мексикалык спортчуну жеңе алса кийинки айлампада япониялык Ясако Каваи менен күрөшүшү мүмкүн. Каваи-Айсулуу беттеши мурда дагы орун алып, биздин мекендеш аны акыркы секунддарда утуп алган.
Тыныбекова жогоруда айтылган эки күчтүү спортчуларды жеңип чыкса индиялык Сакши Малик менен кармашып калышы ыктымал. Сакши Малик Тыныбекованы 2016-жылдагы Риодо өткөн Олимп оюндарындагы 3-орунга болгон кармашта утуп алган болчу.
Эскерте кетсек, Айсулуу Тыныбекова Азиянын үч жолку чемпиону.