Улуттук коопсуздук мамлекеттик комитетинин (УКМК) Коррупцияга каршы кызматы Архитектура, курулуш жана коммуналдык-турак жай мамлекеттик агенттигиндеги коррупциялык схеманы аныктады. Бул тууралуу УКМКдан билдиришти.
Маалыматка караганда, кызмат адамдары социалдык объектилерди куруу үчүн бөлүнгөн каражатты өздөрүнө ыйгарып алышкан.
«Жогоруда аталган агенттикке караштуу Турак жай-жарандык курулуш департаментинин кызмат адамдары жеке курулуш компанияларына мамлекеттик заказдарды аткарууга мүмкүнчүлүк түзүп берип, алардан акча алып турган. Тергөө амалдарынын натыйжасында курулуш компанияларынын биринин өкүлдөрү агенттиктин жетекчилик кызматтагы адамдарына 1 миллион 400 миң сом бергени аныкталды», — деп айтылат маалыматта.
Ыкчам жүргүзүлгөн аракеттердин негизинде Турак жай-жарандык курулуш департаментинин директору А.А.К. жана аталган департаменттин алдындагы инвестициялык долбоорлорду ишке ашыруу координациялык тобунун Э.Р.К. аттуу директору кармалып, УКМКнын тергөө абагына киргизилди.
Учурда тергөө амалдары жүрүп жатат.