“АКШнын президенти Дональд Трамптын администрациясы Венесуэланын убактылуу президенти Делси Родригести Кытайдын, Орусиянын, Кубанын жана Ирандын чалгындоо жана аскер кызматкерлерин чыгарууга мажбурлап жатат” — деп билдирди The New York Times (NYT) гезити кырдаал менен тааныш булактарга шилтеме берип.
Гезиттин маалыматы боюнча, АКШнын мамлекеттик катчысы Марко Рубио 5-январда жабык жыйында Конгресске Венесуэланын убактылуу жетекчилигине койгон талаптар боюнча маалымат берген.
Маалыматка ылайык, Рубио Венесуэланын президенти Николас Мадуро кармалгандан бир нече мүнөт өткөндөн кийин Родригес менен байланышкан.
Сүйлөшүү учурунда Родригес өз өлкөсүнүн эгемендүүлүгүн коргоп, ошол эле учурда элдешүү позициясын көрсөткөнү кабарланган.
Рубио өз кезегинде Родригестен Кытайдын, Орусиянын, Кубанын жана Ирандын чалгындоо жана аскер кызматкерлерин чыгарууну талап кылып, ошол эле учурда айрым дипломаттарга өлкөдө калууга уруксат берилиши мүмкүн экенин билдирген.
Рубио ошондой эле Родригестен АКШ менен Венесуэланын ортосундагы мунай соодасын кайра баштоону талап кылып, Венесуэланын убактылуу жетекчилиги АКШга карата душмандык позицияны карманбашы керектигин баса белгилегени кабарланган.